الزمالك محتاج مهاجم محظوظ
لازم لاعيبة الزمالك تحترم اسم النادى
عبدالواحد السيد آخر كابتن حقيقى للزمالك
محمود علاء لازم يفهم أنه مساك مش ليبرو
عبدالله جمعة سد ثغرة الزمالك فى الجبهة اليسرى
جروس ضايع فى المباريات الكبيرة
لاسارتى رجع الأهلى المخيف مرة أخرى
السماسرة سبب فشل انتقالى للداخلية
دائما ما يثير شوقى السعيد نجم الزمالك السابق الجدل سواء بتصريحاته أو بحماسه الزائد فى بعض الأحيان، ولكن دائما ما يؤكد المقربين منه أنه يمتلك قلب نقى، ولا يتواجد فى أى مكان إلا ويكون هدفه الرئيسى هو نشر البهجة والابتسامة
.
السعيد الذى أكد الجميع اعتزاله كرة القدم الموسم الماضى بعد تعرضه لقطع فى الرباط الصليبى عاش حالة من التحدى والإصرار، حتى عاد من جديد من بوابة الرجاء فى تجربة مختلفة يحكى عنها المدافع الصلب عنها وأمور أخرى عديدة خلال حواره لـ "سوبر كورة".
شوقى.. لماذا ابتعدت عن الدورى الممتاز؟
تعرضت الموسم الماضى لقطع فى الرباط الصليبى خلال تواجدى بصفوف فريق الاتحاد السكندرى، وخضت برنامج علاجى وتأهيلى انتهى فى شهر يناير الماضى، وكانت لدى العديد من العروض بالدورى، ولكن كانت هناك رغبة قوية من جانب فريق الداخلية فى ضمى، وبالفعل تم الاتفاق على كافة التفاصيل، ولكن فوجئت بعلاء عبدالعال المدير الفنى للفريق يقوم بتغيير هذه الاتفاقات تماما، وقتها كلمونى الناس فى الرجاء وقالوا ليا محتاجينك معانا عشان بنافس على الصعود للممتاز، كانت الفكرة مرفوضة، لكن المعاملة الراقية من الحج سعد أبو صندوق رئيس النادى، ومحمد إبراهيم المدير الفنى أجبرتنى على خوض التجربة، وتحدى جديد فى مشوارى الكروى، بعدما لعبت فى صفوف الشمس والجونة والإسماعيلى والزمالك والعربى الكويتى.
ولكن رغم عدد الأندية التى لعبت لها تصنف على أنك زملكاوى؟
بالفعل أعشق الزمالك بجنون، والجماهير البيضاء لها معى ذكريات سعيدة، ورحيلى عن الفريق لا يمنع عشقى له.
وكيف ترى فريق الزمالك الحالى؟
الزمالك أحسن فريق فى مصر، فمجموعة اللاعبين الحاليين يمتلكون قدرات وإمكانات كبيرة، ولديهم القدرة على إسعاد الجماهير، ولكن للأسف الشديد، الحب بين اللاعبين غير موجود، ودى مشكلة كبيرة وظهرت فى أكثر من مباراة، وبيبقى ليها تأثير سلبى كبير.
تقصد المشادات بين اللاعبين خلال المباريات؟
دى مش حاجة صغيرة لما تحصل حاجة زى دى اللاعيبة بتفقد تركيزها، وبيبقى فى رد فعل مش مقبول، ووقتها لو وقفت اللاعب هيبقى الفريق هو الخسران عشان كدة لازم يبقى فى حل فورى للمشاكل اللى بتحصل بين اللاعيبه خلال الماتشات، والبحث عن طرق لعودة الحب بين اللاعبين مرة أخرى.
وكيف يتم حل ذلك من وجهة نظرك؟
الفوضى لا يتم التخلص منها سوى بالقرارات القوية، فيجب أن يتواجد قائد داخل الفريق، الكابتن لازم يكون مسيطر على اللاعيبة، أنا بحب حازم إمام، لكن اللى بيحصل بين فى الماتشات وبيظهر للجماهير ده مش منطقى وبيأكد أن فى مشكلة، بصراحة من يوم رحيل عبدالواحد السيد، والفريق محتاج شخصية قوية تقرب اللاعيبة من بعض وتحل أى أزمة داخل الملعب بشكل فورى، مع وجود مدير كورة قوى زى عبدالحليم على أو تامر عبدالحميد، الكل تابع خناقات أوباما مع فرجانى ساسى وكهربا، حاجات شكلها مش ظريف، وتسئ لأسم الزمالك، رغم أنها بتحصل فى الكورة لكن فى الزمالك مش بتتلم بسرعة، قبل كدة شيكابالا شتمنى وفى ثانية أتلم الموضوع وبعد الماتش أعتذر ليا، لازم ده يحصل دلوقتى لان الفريق مش مستحمل خسارة لاعب أو خسارة مباراة.
لكن أمير مرتضى موجود والجميع يشيد بدوره؟
ما أطالب به لا يتعارض مع دور أمير مرتضى، فهو يحقق استقرار داخل الفريق، ولكن النقاط التى اتحدث فيها، تحتاج إلى شخص مارس كرة القدم، فهناك أمور داخل الملعب لا يفهمها سوى اللاعبين، الحالة النفسية، والتأهيل، والتوفيق، والحظ، وغيرها الكثير تحتاج لنجم كرة مر بهذه الظروف حتى يساعد اللاعبين ويتفهم ما يمرون به.
وهل ترى قرار إيقاف كهربا صحيح؟
كهربا لاعب مهم، والفريق محتاجه، فلما بوقف لاعب كدة أنا بعاقب الفريق والجماهير، عشان كدة الحل فى الخصومات المالية، اللى يغلط يتخصم منه، وفى نفس الوقت لازم المشجع اللى يخرج عن النص ويسب لاعب بأمه يتحاسب هو كمان، ويتم منعه من دخول المباريات.
وكيف ترى خط دفاع الزمالك؟
فريق الزمالك بيقدم ماتشات كويسة لكن فى بعض الثغرات داخل الفريق ومنها خط الدفاع، يعنى محمود علاء بيسجل أهداف وبيقدم مستوى جيد لكن عنده مشكلة أنه مش بيمسك المهاجمين، بيسيب المهمة للونش أو محمد عبدالغنى، وده مش صح لأنه أصلا مساك مش ليبرو، مع زيادة التركيز هتبقى الأمور أفضل من كدة بكتير.
هل الفريق يحتاج لصفقات جديدة؟
كان فى مشكلة فى الظهير الأيسر وحلها عبدالله جمعة، وفى مشكلة فى الناحية اليمين، حمدى النقاز بيقدم مستوى جيد لكن التغطية العكسية عنده متأخرة، والفريق بيستقبل أهداف كتيرة بسببه، ودى ممكن تتحل من خلال الجهاز الفنى، لكن أنا من وجهة نظرى أن الزمالك محتاج مهاجم محظوظ، لان الفريق بيجيب احسن مهاجمين لكن لو محظوظين كان كل واحد جاب فى كل ماتش 3 أهداف.
وهل ترى أن جروس قدم المطلوب منه مع الفريق؟
الزمالك حتى الآن متصدر مسابقة الدورى، لكن بصراحة أنا مش حاسة، شايف أنه ملوش أى بصمة فى الفريق، اللاعيبة فى يومهم الزمالك بيقدم ماتش كويس وبيكسب مرتاح، لكن لو فى أى أزمة مش بيدخل ويحلها، أو فى جمل بتحصل تقول أن فى مدرب واقف على الخط، غير طبعا أنه فى الماتشات الكبيرة مش موجود، حتى مباراة بيراميدز اللى انتهت 3 – 3 اللى ساعده فيها أن حسام حسن لعب وقتها مفتوح، وساب له مساحات كبيرة خلت الزمالك راكب الماتش، غير كدة مش شايف أنه لم يقدم أى جديد.
هل ترى أن الزمالك اقترب من حسم الدورى؟
الطبيعى والمنطقى آه، لكن أنا خايف على الدورى من جروس، لأنه هيلعب قدام الأهلى، واللى قدمه مع الفريق بيأكد أنه مش بيعرف يكسب الفرق الكبيرة، وماتش الأهلى صعب، لأنهم بيعرفوا يقفلوا الملعب، ومش بيخلوا فى مساحات كبيرة، اللى بتظهر فيها إمكانات لاعيبة الزمالك، والأهلى لو كسب الزمالك وركب الدورى مش هينزل، فعشان كدة بيقول دماغ جروس هضيع الدورى من الزمالك.
هل الأهلى مخيف لهذه الدرجة؟
البطولة فى ملعب الزمالك، والفريق الأبيض هو من سيحدد مسارها، ولكن بالتأكيد الأهلى عاد من جديد مع لاسارتى، وذكاء الإدارة التى نجحت فى تأجيل عدد كبير من مباريات الفريق، حتى تفهم اللاعبين فكر المدرب وانسجام الصفقات الجديدة وعودة المصابين، وأصبح هناك أداء ونتائج، والفريق الذى سيحسم مباراة القمة سيكون له الفرص الأكبر للفوز بالبطولات، لأن الجوانب النفسية ستؤثر بشكل كبير.
كيف ترى اختيارات أجيرى الأخيرة؟
الأسماء التى تم إعلنها لمعسكر المنتخب تؤكد أن أجيرى ليس صاحب قرار الاختيار، وهناك تدخلات، لأن عدم ضم عبدالله السعيد وعبدالله جمعة وأحمد على، وتواجد صلاح محسن المصاب، أمر لا يستطيع شخص عاقل تفسيره.
فى النهاية كيف جاء لقب "أبو الدبابيس" الذى يطلق عليك؟
وليد سليمان لاعب الأهلى هو السبب فى هذا اللقب، عندما كنت ألعب فى الزمالك واجهنا الأهلى فى نهائى كأس مصر عام 2016، وكان يقود الفريق الأبيض فى تلك الفترة مؤمن سليمان، ونجحنا فى تحقيق الفوز بثلاثة أهداف مقابل هدف، سجلهم باسم مرسى "هدفين"، ومصطفى فتحى هدف، ولكن عقب المباراة فوجئت بهجوم لاعبى الأهلى ومحاولتهم الاعتداء على بداعى أن وليد سليمان قال لهم "ده معاه دبوس مخبيه فى الشورت وكان بيشكنى بيه طول الماتش".
للأسف وليد سليمان حاول تبرير مستواه فى المباراة وهزيمة فريقه بهذا المباراة، ولكن الأمور لم تقف عند هذا الحد بل استمرت تلك الاتهامات تطاردنى حتى الآن وأصبح شوقى السعيد "أبو الدبابيس".
