مرتضى منصور يهاجم الكاف والجبلاية ومحمد صلاح ويكشف حقيقة توقيع كهربا للأهلي ويؤكد: الكوادر المصرية في صفيحة الزبالة

10 اكتوبر 2019 الساعة 12:35 مساء

واصل مرتضى منصور رئيس نادي الزمالك هجومه على مسئولي الاتحاد الإفريقي لكرة القدم "كاف" بعد قرار إعادة مباراة الفريق الأبيض أمام جينيراسيون فوت السنغالي في إياب دور الـ 32 لبطولة دوري أبطال إفريقيا، ووقوع الزمالك في مجموعة صعبة حال تخطيه عقبة الفريق السنغالي.

وقال رئيس نادي الزمالك خلال تصريحات تليفزيونية لبرنامج "الزمالك اليوم" الذي يبث عبر قناة الحدث الفضائية: "جابوا للأهلي فرق ضعيفة والزمالك فرق قوية في دوري الأبطال، دي مش قرعة".

وتابع: "بقول للاتحاد الإفريقي لو عايزين تسيبوا المقر إمشوا، إنتوا بتعملوا فتنة في البلد".

وأكمل: "محمد شوقي وأحمد حسن طالعين يقولوا إحنا بنفتخر بالأهلي، مفيش حازم إمام؟ مفيش أيمن يونس؟ هو الاتحاد اتأمم يا فاطمة يا سامورا؟ الكوادر المصرية في صفيحة الزبالة، احترموا نفسكم وانتوا بتعملوا القرعة، الزمالك ميقلش عن الأهلي".

كما هاجم مرتضى منصور رئيس نادي الزمالك، محمد صلاح نجم نادي ليفربول الإنجليزي ومنتخب مصر الوطني، على خلفية صور الأخير مع الإعلامي باسم يوسف أثناء حفل شخصية العام الذي أقيم بالإمارات خلال الأيام الماضية.

وقال رئيس نادي الزمالك: "محمد صلاح بقى منفوخ، طرد أهل قريته قبل صلاة العيد، انت بتتصور ليه سيلفي مع باسم يوسف ؟ بتتصور ليه مع أبو تريكة؟ ما تولع ليفربول، انت بتستفزنا ليه؟ مصر اللي عملتك بني آدم".
 
وتابع: "أنت فاكر نفسك إله يا صلاح ؟ أنت حتة لاعب، الفلوس والشهرة وصلتك لكدة؟ صالح سليم كان محترف في النمسا عمره ما عمل اللي بتعمله، عنك ما جيت المنتخب".

وأكمل: "أنا أستفدت إيه لما روحت ليفربول وبتجيب كل يوم جول؟ عملت إيه في كأس العالم؟".

وأضاف: "أتحملنا القرف اللي بتعمله يا صلاح، كفاية حلاقة شعر صدرك واليوجا اللي بتعملها".
من ناحية أخرى، أعلن مرتضى منصور رئيس نادي الزمالك، عن تسوية ديون النادي خلال الأيام الماضية مع لاعبيه الأجانب السابقين، وقال "معنديش لاعب أجنبي له جنيه، ولا سيسيه ولا كريم الحسن".

فيما نفى مرتضى منصور رئيس نادي الزمالك، صحة ما تم تداوله عن توقيع محمود عبدالمنعم "كهربا" لاعب الزمالك المنتقل إلى صفوف نادي ديسبورتيفو أفيس البرتغالي، للغريم التقليدي الأهلي، وقال "الأهلي لم يتعاقد مع كهربا، دي خطة معمولة بعد قصة ماتش جينراسيون ما خلصت".

وتابع: "الأهلي لو فيه راجل يطلع عقد كهربا، مجدي عبد الغني الأهلاوي قال أن كهربا عقده مع الزمالك مستمر 3 سنين".

وأكمل: "أنا قولت قبل كدة هوصل كهربا لغاية باب الأهلي، بس الزمالك ياخد حقه، كهربا ضيع السوبر من الزمالك في الإمارات".

وأضاف: "قولت لتركي آل الشيخ المحترم قبل كده خد كهربا، قالي أخده فين؟ مش هاخده، لو راح الأهلي يروح وعليه بوسة، القضية شغالة والملف راح كله بالفيديوهات لما كان بيقول بابا مرتضى".

وشدد: "صبري رحيل وإينو ومحمد صديق الأهلي رامهم، مؤمن زكريا قال للخطيب مش لاقي أكل، لولا أنا اللي طلعت وقولت أعالجه على حسابي مكنوش أتحركوا".

وتمنى مرتضى منصور رئيس نادي الزمالك، السلامة لمحمود الخطيب رئيس النادي الأهلي، بعد الوكعة الصحية التي تعرض لها خلال الأيام الأخيرة، وقال: "حمد الله على سلامتك يا كابتن محمود الخطيب".

وتابع: "أنا قررت يكون فيه هدنة مع محمود الخطيب، اكتشفت أن يوسف حفيده صاحب عمر حفيدي في المدرسة، عشان خاطر عمر يا كابتن محمود هيبقى فيه هدنة وربنا يشفيك".

بينما واصل مرتضى منصور رئيس نادي الزمالك، هجومه على مسئولي اتحاد الكرة المصري بسبب لقاء القمة المقبل أمام الأهلي.

وقال رئيس نادي الزمالك: "هو أنا بعت طلب عشان أجل ماتش الأهلي؟ اتحاد الكرة بيقول ليه إحنا رفضنا طلب الزمالك؟ فيه إيه يا فضل أنت وجمال محمد علي؟".

وتابع: "أنا عملت كمين، زي حكاية المدرب اللي كان في إسرائيل".

وأكمل: "على جثتي لو الأهلي طلب يأجل ماتش عشان إفريقيا، أنا قدمت السبت وعلى كتافي جبت لاعيبة جديدة، لو الأهلي عايز يلاعبني بكرة يالا أنا عندي وحوش".

وأضاف: "الأهلي عارف لولا الخطأ اللي كان في الشوط الأول، كنا كسبناهم في السوبر".

ومن المقرر أن يلتقي الفريقين يوم 19 أكتوبر الجاري، في الجولة الرابعة من بطولة الدوري المصري الممتاز.