زوجة عماد متعب متهمة بالعنصرية .. التفاصيل كاملة

19 يوليو 2020 الساعة 11:30 صباحا

مهاب ممدوح
 
اتُهمت يارا نعوم زوجة عماد متعب نجم الأهلي الأسبق بالعنصرية ضد إحدى الفتيات وذلك في منتجع سياحي.


ونشرت إحدى الفتيات قصة كاملة تشير إلى أن يارا نعوم قامت بالعنصرية على إحدى العاملات ورفضت نزولها إلى "المغطس".


وجاء المنشور الذي تم تداوله عبر مواقع التواصل على النحو الآتي:


امبارح السبت ١٨ /٧ /٢٠٢٠
انا و جوزى وولادى و البيبى سيتر كنا موجودين فى Albatros White Beach, Hurghada
و احنا نازليين البوول زى كل يوم فوجئت بواحدة كبيرة فالسن بتناديلى بتقولى “الشغالة متنزلش انا مش هنزل الماية مكان الشغالة “
استفزيت جدا و راعيت فرق السن و سكت
بعدها بدقيقة جه Life guard بيقولى معلش البنت لازم تتطلع علشان لابسة قطن المهم مع احترمت كلامه و طلبت من البنت تطلع تغير و تلبس بوركينى ووتر برووف زى بتاعى و قد كان
فالوقت ده عرفنا انه اللى قاعدين واحدة اسمها ي. ن مرات لاعب كورة سابق اسمه ع .م و والدتها
نزلت البنت بالبوركينى و كنت معتقدة القصة انتهت فجأة جت ى اتهجمت عليا فالبوول بتقولى “ انتى يا بنتى هبلة انتى عارفة انتى بتعندى مع مين .. لو مش عارفة انك فريزورت محترم مينفعش تنزلى فى شغالتك روحى بيها بلطيم ! .. انا مش هنزل مكانها دى مقملة و مجربة فى حاجة اسمها هايچين انتى مجنونة ..ده النوادى مبتنزلش شغالات ناقص انزل مكان شغالة ايه القرف ده مش قادرة تشيلى عيالك احنا مالنا “
ده اللى فاكراه طبعا غير وابل من الشتايم و مامتها بتقولها هعملكم محضر ورا ????
انا مسكتش طبعا و حاولت افهمها انه اللى بتقوله ده قرف و عيب و انه البنت نازلة بووتر برووف زيها زيك و حاجزة اوضة لوحدها زييها زيك
لحد ما تدخل حد من الادارة
سألته بمنتهى الهدوء ٣ اسئلة
- هل المكان بيمنع البوركينى ؟ قاللى لا
-البنت حاجزالها اوضة لوحدها هل بتمنع الاجانب انهم ينزلوا البوول ؟ قاللى لا كله مرحب بى
-هل قبل ما تنزل البوول بتسأل عن خلفية عمله ؟ قالى لا
الراجل مشكورا اعتذر عن غلطة معملوهاش اصلا و البنت نزلت و بعد ما المرضوع انتهى بعتولنا كادوه مشكورين
انا بس متعجبة انى فى ناس بالطبقية و سواد القلب ده انا مش فارقلى مهاتراتها معايا تماما لانى رديت عليها باللى يناسب تربيتى اللى واجع قلبى انه البنت كانت واقفة و سامعة كل الاهانة دى بدون اى ذنب عملته