عمرو أديب عن فوز الزمالك على الأهلي: مدرسة الفن والهندسة فتحت تاني .. عايز تغيظه هاتله زيزو

23 يوليو 2022 الساعة 11:29 صباحا

مهاب ممدوح
 
أثنى الإعلامي عمرو أديب على لاعبي الزمالك عقب مباراة القمة في نهائي الكأس ضد الأهلي والتي انتهت بفوز الزمالك بهدفين مقابل هدف.

وقال عمرو أديب عبر برنامجه الحكاية: "ماتش امبارح مدرسة الفن والهندسة فتحت فيه تاني"

وأضاف: "من أول عواد اللي كان مش عارف يسخن، بسبب إن مفيش حاجة بتجيله لحد الدفاع المقاتل الونش والمثلوثي كان رائع لأول مرة وحسام عبد المجيد رائع وسيد نيمار الولد صغير وعنده ثقة تحس إنه في خبرات الدنيا كلها وطبعا فتوح ويا عيني على فتوح وروقا وإمام عاشور كتلة الموهبة لو ركز هيكون في أوروبا الموسم الجاي"

وواصل:"اللي عمله زيزو ده مش طبيعي، عايز تغيظه هاتله زيزو الواد بيعمل كل حاجة في الكورة ما شاء الله، وعبد الغني اكتشاف جديد في وسط الملعب الراجل فيريرا ده عبقري وبيعترف إنه أخطأ في تغييراته رغم خبراته الكتيرة"

وتابع:"ياسلام على بن شرقي.. كان عايز يختم مسيرته في الزمالك بهدية ملفوفة للجمهور الواد يرقص كدة لاعيبة الأهلي تروح معاه يرقص كدة برضو تروح معاه وياسلام على الجزيري وشيكابالا القائد اللي دوره في الملعب وبرا الملعب أهم"

وعن مدحت شلبي قال:"مدحت شلبي عمال يقولك نفسي أفشة يرجع مكانه ما عنه ما رجع يا كابتن مدحت.. احنا مالنا يرجع ولا ميرجعش ما عنه ما رجع.. وفرح أوي وروحي روحي روحي لما مركز أفشة اتغير مش فاهم ليه"


وختم حديثه قائلا:" الاستديو التحليلي محدش هيقولك الزمالك كسب ليه.. كله هيتكلم الأهلي خسر ليه لازم طبعا دي أزمة احنا في أزمة احنا في كارثة ازاي الأهلي يخسر محدش هيدي الزمالك حقه وبعد كدة جمهور الاهلي لما يخسر يقولك روح رياضية.. هو انتوا لازم اللي تفرحوا بس مينفعش حد غيركم يفرح انتوا مش بتعرفوا تخسروا طبيعي زي اي حد في العالم.. وبالنسبة للتصوير هو ايه اللي عمله مخرج الماتش ده.. ليه مكملش رقصة شيكابالا في مشكلة ولا حاجة ليه تجيب الصورة من فوق.. المخرج زعلان أو حاجة"
 
عمرو أديب يهاجم سيد عبد الحفيظ
هاجم الإعلامي عمرو أديب، سيد عبد الحفيظ مدير الكرة بالنادي الأهلي، بسبب رفضه الدخول في ممر شرفي بعد خسارة الأهلي بنهائي كأس مصر بهدفين مقابل هدف.

قال عمرو أديب في تصريحاته عبر إم بي سي مصر عبر برنامجه الحكاية: "اتحاد الكورة لازم يعاقب سيد عبد الحفيظ لازم حد يعاقبه والموضوع ميمشيش كدة انت بتزرع تعصب الكل هيقولي طبعا ازاي تقول كدة انت بتقول كدة على مدير الكورة بتاع الكيان ازاي انا بقول اللي مفيش اعلامي رياضي قادر يقوله قناة أون اللي بيقولوا عليها زملكاوية محدش اتكلم فيها عن اللي حصل"

قال عمرو أديب في تصريحاته: "ايه السواد ده يا سيد.. سيد يا سيد.. انت خاسر سيئ يا جماعة في ناس في الاهلي مبتعرفش تخسر"

أضاف: "اللي عملته يا سيد حركة بلدي ومفيهاش اخلاق رياضية.. لازم الخطيب يعاقبك هي دي المبادئ يا سيد؟"

وختم حديثه قائلا: "سيف زاهر يقدر يقولك كدة ولا شوبير انا اعلامي وبقولك اللي انت عملته حركة بلدي ومفيهاش اخلاق رياضية"