مرتضى منصور يهاجم مصطفى فتحي لهذا السبب ويقول الشناوي نصاب والشامسي لازم يتدخل .. ويكشف حقيقه التفاوض مع لاعب الأهلي .. واتبرعت لمستشفى 57357 ومش هقول كام عشان دي حاجة مع ربنا

24 ديسمبر 2022 الساعة 1:32 مساء

مرتضى منصور: مصطفى فتحي معندوش دم والشناوي نصاب والشامسي لازم يتدخل .. عليا الطلاق ما كلمت الشحات.. واتبرعت لمستشفى 57357 ومش هقول كام عشان دي حاجة مع ربنا


سارة عبد الباقي
خرج مرتضى منصور رئيس نادي الزمالك بعدة تصريحات قوية خلال الساعات الماضية وجه من خلالها رسائل نارية لبعض الشخصيات، وذلك عبر مداخلة هاتفية على قناة نادي الزمالك، نستعرض في موقع "أخبار الزمالك" أبرز ما جاء فيها.

جاءت إحدى تصريحات مرتضى منصور النارية من نصيب مصطفى فتحي لاعب الزمالك السابق وبيراميدز الحالي، بسبب المستحقات المتبقية للزمالك لدى التعاون السعودي، وأكد مرتضى منصور أنه تقدم بشكوى في الاتحاد الدولي لكرة القدم "فيفا" للحصول على باقي قيمة بيع مصطفى فتحي للنادي السعودي، وقال مرتضى منصور: "أنت يا مصطفى كنت جاي الزمالك غلبان وأبوك كان بيجي يقولي إن معمولك سحر، أنت عيطت، عشان نوافق إنك تمشي ووافقنا على رحيلك للتعاون السعودي مقابل مليون دولار حصلنا على 600 ألف دولار ويتبقى لنا 400 ألف دولار، كان من المفترض عليك تطالب بيراميدز والتعاون، بحصول نادي الزمالك على باقي مستحقاته، المفروض تقولهم أدفعوا فلوس الزمالك لأنه اللي رباني وخيره عليا، الزمالك هو اللي عملك، أنت لاعب معندكش دم، ومحمد صبري لما جابك كنت إيه؟، لينا 400 ألف دولار ما يساوي 12 مليون جنيه عند نادي التعاون، أنت هتنصب علينا يا تعاون".

وتابع: "اللي بيعمله التعاون بيسئ للسعودية أنت بتعاندنا؟، عايز الفلوس اللي عليك، خلي عندك دم يا مصطفى وكلم النادي المعار منه قوله إدي الزمالك فلوسه، معتقدش إنك استفدت حاجه من أخلاقيات لاعبي الزمالك المحترمين، إحنا قدمنا شكوى للفيفا وللاتحاد السعودي المحترم ضد التعاون".

وواصل مرتضى منصور توجيه رسائله القوية، وطالب بإيقاف أحمد الشناوي حارس مرمى نادي بيراميدز بسبب رفضه إعادة 8 مليون جنيه للزمالك، حيث قال: "الشناوى حصل على 8 ملايين جنيه للتجديد للزمالك عام 2018 ولكن بعد ذلك تم بيعه لنادي بيراميدز  وكان يجب عليه إعادة الفلوس اللي حصل عليها ولكنه لم يفعل، تقدمنا بشكوى ضده في اتحاد الكرة الذى أقر بحق الزمالك وضرورة إعادة اللاعب لمبلغ 8 مليون جنيه، والشناوى قدم تظلم للجنة التظلمات باتحاد الكرة ولكن اللجنة برئاسة المستشار عادل الشوربجي أكدت حق الزمالك في المبلغ، قبل تجميد مجلسنا في نوفمبر 2020، وبعد رحيلنا لجأ أحمد الشناوي لمركز التسوية والتحكيم وحصل على حكم بعدم السداد في عهد لجنة حسين لبيب، رغم أنها ليست جهة اختصاص مثلما حدث فى أزمة إيقاف شيكابالا، أطالب بإيقاف أحمد الشناوي لحين سداد مستحقات الزمالك وتنفيذ قرار الجبلاية، وسنسلك كل الطرق للحفاظ على حقوقنا".

وأردف: "أطالب سالم الشامسي رئيس نادي بيراميدز بالتدخل وإنهاء الأزمة، مش عارف إزاي الشناوي بيلعب دون إيقافه وفقاً لقرار اتحاد الكرة ولجانه".

وكشف مرتضى منصور حقيقة الحجز على المستحقات الخاصة بغرامة كهربا لاعب الأهلي في حال دفعها، مؤكداً أن الإعلام لا يتحدث على الهارب كهربا، وبيقولوا هيلعب غصب عنكم، وهيشارك في كأس العالم للأندية، حيث قال: "هعلمكم القانون اللي بيقول كهربا هيحط الفلوس في الحساب المحجوز عليه، والزمالك مش هيخدهم، بقوله الحساب أتقفل على المبلغ اللي أتحجز عليه، وأي فلوس جديدة باخدها عادي، بفهم الجهلاء فيه فلوس دخلت وأخدناها بشكل طبيعي، لأنه مجرد مابتعمل إقرار بالذمة المالية وقت الحجز الحساب بيتقفل"

ورد مرتضى منصور على ما يتعلق بالأخبار المتداولة بخصوص التعاقد مع حسين الشحات، بعدما انتشرت شائعات حول نية الزمالك في مساعدة اللاعب على الهروب من الأهلي وفسخ عقده لتسهيل مهمة انتقاله للزمالك، ونفى مرتضى منصور كل الأنباء المترددة بخصوص التعاقد مع حسين الشحات، مؤكداً أن الزمالك لا يفكر إطلاقا في التوقيع مع حسين الشحات أو الحصول على خدماته.

وأضاف: "عليا الطلاق وحياة القرآن ما كلمنا الشحات ولا أنا ولا حتى عامل في النادي، هفكر أديه 30 مليون جنيه إزاي؟، ولا هو عشان إسمه حسين الشحات، أنا عندي في الزمالك أحمد سيد زيزو أحسن جناح في مصر، وحسين الشحات شتم شيكابالا قائد الزمالك، أزاي هأفكر أتعاقد مع لاعب أتخانق مع لاعب عندي، كل الكلام ده كذب ومحصلش".

وفي شأن آخر، أكد مرتضى منصور إنه كان لا ينوي خوض انتخابات الزمالك الأخيرة، ولكن مسؤولين كبار بالدولة طلبوا منه خوضها لإنقاذ النادي، حيث قال: "مكنتش ناوي ادخل انتخابات مجلس الإدارة الأخيرة، بس في مسؤولين كبار بالدولة طلبوا مني خوض الانتخابات لإنقاذ الزمالك، لجنة حسين لبيب دمرت نادي الزمالك، والمسؤولين قالولي لازم تدخل الانتخابات عشان تنقذ النادي وترجعه لمكانته تاني".

وتطرق مرتضى منصور للحديث عن مستشفى 57357، الخاصة بعلاج سرطان الأطفال، حيث قال: "أنا المستشار القانوني لمستشفى 57357، وهي حالياً تمر بأزمة مالية صعبة، ولازم كلنا نقف جنبها عشان متقفلش، في مئات الأطفال بيتعالجوا فيها، أنا وعائلتي هنتبرع بمبلغ مالي لصالح مستشفى 57357، بس مش هقول كام عشان دي حاجة بيني وبين ربنا".