مرتضى منصور يفتح النار على الخطيب بعد صفقة القندوسي ويؤكد صفقات الأهلي كيد النسا ويكشف سر جديدة فى صفقة المهاجم الجزائري

29 يناير 2023 الساعة 5:22 صباحا

مرتضى منصور صفقات الأهلي كيد النسا وخايف من تكرار مذبحة بورسعيد بين جماهير الأهلي والزمالك 
سارة عبد الباقي 
شن المستشار  مرتضى منصور ، رئيس نادي الزمالك، هجوماً حاداً على محمود الخطيب رئيس الأهلي بسبب صفقتي مروان عطية  وأحمد قندوسي، اللاتي أبرمهما النادي الأحمر. 
وقال مرتضى منصور في تصريحات لقناة الزمالك: "رسالة إلى السيد الرئيس عبدالفتاح السيسي، محمود الخطيب مش قادر يتحمل المسؤولية تجاه الوطن وهيولع البلد، الخطيب بيلعب بالنار، الموضوع عدى المنافسة والصفقا، هو بيعمل حرب بين جماهير الأهلي والزمالك بقصد، عمرنا ما دخلنا في صفقة الأهلي داخل فيها، ولا خدنا لاعب عقده مستمر مع الأهلي، مش في عهد مرتضى منصور بس لأ في تاريخ الزمالك كله، مينفعش أخد واحدة على ذمة جوزها وإلا يبقى زنا،واللي بيحصل دلوقتي زنا رياضي". 
وتابع: "البلد داخلة في فتنة رياضية لا يعلم إلا الله مداها، ولو حد عنده ضمير يوصل الفيديو ده للسيسي،اتفقنا مع الاتحاد السكندري بقيادة أخويا محمد مصيلحي على صفقة انتقال محمود علاء للاتحاد ومروان عطية الزمالك، وكنا نرغب في ضم مروان عطية الصيف الماضي، ولكن الاتحاد السكندري طلب من الزمالك رحيله عقب نهاية الموسم الحالي، واتفقنا أن الصفقة ستكون مقابل 12 مليون جنيه، وأتمننا الإتفاق  وأعلن عنه مصيلحي على الهواء مباشرة،ولكن الدودة اشتغلت عند الخطيب، عايز يولع البلد ومش هسكت يا دولة". 
وأكمل: "الخطيب زار مصيلحي في بيته والـ 12 مليون بقوا 25، مصيلحي كلمني وقالي، قولتله لأ ده يبقى إسمه إهدار مال عام وغسيل أموال، أدفع 25 مليون في مين؟ وقفلنا الصفحة". 
وأضاف رئيس الزمالك : "وصلتني رسالة من رئيس نادي وفاق سطيف عبدالحكيم سرار، اللي فوت الماتش للأهلي، وعرض عليا ضم أحمد قندوسي مقابل 500 ألف دولار، قندوسي وكلائه سوريين ورئيس وفاق سطيف طردهم من النادي لأنه سمسار وعايز العمولة لنفسه". 
وعرض مرتضى منصور رسالة عبدالحكيم سرار التي أرسلها لأمير مرتضى المشرف على فريق الكرة بنادي الزمالك، يقول خلالها أن هناك عروضاً أخرى تلقاها من سماسرة لضم قندوسي، وإذا أراد الزمالك ضمه، عليهم التواصل معه مباشرة. 
وأردف مرتضى منصور، قائلاً: "سمعت يا خطيب؟ كان معروض عليا بـ 500 ألف دولار وأنت روحت دفعت فيه 60 مليون جنيه، محدش أتكلم عن صفقة ناصر منسي اللي اشترناه بـ 20  مليون جنيه بس، ودفعنا كاش عشان الناس اللي بتقول الزمالك مفهوش فلوس". 
وتابع  رئيس الزمالك : " كولر طلب رأس حربة، مطلبش رقم 8 أو 10، لكن الأهلي جاب مروان عطية كيد نسا، عشان يتقال بيبو الأسطورة، لا أنت مش أسطورة، أنت هتولع البلد،أمير توفيق سافر عشان يجيب موليكا بـ 3 ونصف مليون دولار وناديه طلب 5 مليون، عشان الزمالك ضربكم في صفقة ناصر منسي، الأهلي واخد قرض بـ 100 مليون متسددوش، وعنده خساير في الكورة 200 مليون، هما الإخوان دلوقتي بيمولوا؟ مهو حاجة من 2 يا غسيل أموال يا الإخوان بيمولوا عشان أوصل سعر لاعب من 500 ألف دولار لـ 2 مليون دولار عشان أكيد وأعمل فتنة في البلد كلها". 
وأتم المستشار  مرتضى منصور، قائلاً: "المسؤولين اللي كلموني فوق دماغي وأنا ألتزمت عشان البلد، مين بيستفز دلوقتي؟ سيد عبدالحفيظ الأخوانجي وزوج بنت الخطيب الأخوانجي، يبقى دي خطة معمولة عشان البلد تولع، القصة بقت أمن قومي مصري، كل اللي بيساند الخطيب يفوق، أنا شغلت اللمبة الحمرا الخطيب بيلعب بالنار، لعيبة الأهلي لحد دلوقتي مخدتش مقدمات عقودها، مش هتعرف نلم دي رسالة للدولة، مجزرة بورسعيد هتتكرر بين جماهير الأهلي والزمالك". 
وقام مرتضى منصور في نهاية حديثه بتذكير الخطيب بواقعة المائة جنيه عندما طلبها الأخير من مسؤولي اتحاد الكرة، وقتما كان يعاني من إصابة عندما كان لاعباً.