لقاء الخميسي امى مسيحية وكنت بأصلي زيها ورفضت مشهد السرير خوفا على عبد المنصف وشعرت بخيانة زوجي

19 مارس 2024 الساعة 11:44 مساء

لقاء الخميسي: رفضت فيلم إحكي يا شهرزاد بسبب مشهد في السرير.. ولو عملته محمد عبد المنصف كان هيقعد في البيت
لقاء الخميسي: الجمهور هاجم محمد عبد المنصف علشان كان فضيحة أنه اتجوز ممثلة.. رفضت فيلم مع يوسف شاهين بسبب مشهد بوسة




تحدثت الفنانة لقاء الخميسي، عن علاقتها بزوجها محمد عبد المنصف حارس مرمى نادي الزمالك السابق ومنتخب مصر، كما كشفت عن رفضها فيلم إحكي يا شهرزاد، وفيلم سكوت هنصور، بسبب المشاهد الجريئة.
 

وقالت لقاء الخميسي، خلال استضافتها ببرنامج "أسرار" مع الإعلامية أميرة بدر المذاع على قناة النهار: ممكن أكون أثرت على زوجي محمد منصف في حاجة ولكن مش المسيرة، ولكن وقت ما اتجوزني الجماهير هاجمته أنه ليه ممثلة زمان كانت وقتها فضيحة أنه يتجوز ممثلة، وأنا زوجي مأثرش فيا زي ما أنا أثرت فيه، ولادي اللي أثروا فيا جامد.
أما عن تفاصيل رفضها فيلم إحكي يا شهرزاد، فقالت لقاء الخميسي: اللي جوزي رافضه أنا كمان كنت هرفضه، وأنا مش واخدة على المشاهد المنفتحة الزيادة، وفيلم إحكي يا شهرزاد اتعرض عليا دور المحامية اللي كانت قصاد أستاذ محمود حميدة، وكان في مشهد على السرير واللي رشحني أستاذ وحيد حامد الله يرحمه، وقابلته وقولتله مش هقدر أعمله علشان مشهد على السرير، قالي أنتي بتهزري أنتي بترفضي فيلم لـ وحيد حامد وأنا شايفك نجمة؟ قولتله لأ أنا مش برفض فيلم لو حضرتك شيلت المشهد ده همثل، قالي مش أنتي اللي هتقولي لي أشيل إيه ومشيليش إيه.
وتابعت: لو كنت قلبت ده كان هيحصل لجوزي مشاكل، خاصة أن جمهور الزمالك كان بيشتم أنه اتجوز ممثلة، في أعمال مهمة جدًا رفضتها وقعدت أعيط أسبوع في البيت بسبب مشاهد، ورفضت فيلم سكوت هنصور مع يوسف شاهين وكنت هموت، رفضت الفيلم بسبب مشهد بوسة، وروبي هي اللي عملت الدور.
وأضافت: لو رجع بيا الزمن لو مفيش بوسة في الفيلم هقبله، وأنا مبقولش أن اللي هيعمل ده مش كويس، ولكن أنا مش هقدر، والفيلم التاني إحكي يا شهرزاد مشهد كان بالنسبة ليا تقيل أوي ووقتها كنت متجوزة، ولو المشهد ده كنت عملته محمد عبد المنصف كان هيقعد في البيت.
برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.


لقاء الخميسي: حسيت بخيانة زوجي في فترة.. والست الناصحة اللي متخربش على نفسها


أكدت الفنانة لقاء الخميسي، أن شرارة الحب بينها وبين زوجها محمد عبد المنصف حارس مرمى نادي الزمالك السابق ومنتخب مصر، لم تنطفئ، موضحة أنها شعرت بخيانته في فترة من فترات حياتهم ولكنها قررت الحفاظ على بيتها وعلاقتهم.
وقالت لقاء الخميسي، خلال استضافتها ببرنامج "أسرار" مع الإعلامية أميرة بدر المذاع على قناة النهار: طبعًا بحب جوزي لغاية دلوقتي لأن هو راجل يتحب، مفيش حد معندوش عيوب ومكنش بيقعد معايا كتير ولكن هو راجل حنين وبيحب ولاده وأمي وإخواتي وكل الناس، وقبل كده أخويا حصل له أزمة ووقف معاه، وأنا عديت بمرحلة سخيفة في حياتي في نص الثلاثينيات واستحملني، وكنت أوقات بروح الشغل وأرجع أقول أنا مش عايزة أشتغل تاني وكان بيستحملني.
ووجهت لقاء الخميسي، نصيحة للنساء بعدم التفتيش وراء أزواجهن، قائلة: هو في بداياته في الـ 37 سنة دي كنت ببلع حاجات كتير، زي أنه سافر شهر ومعرفش عنه حاجة، وأكلمه يقولي سيبيني حاجة، وجوزي أنضف من أنه يتقفش، وأنا حسيت أن في حاجة حصلت وأنا مش هفتش وراه وأضايق نفسي ليه؟ ما كل حاجة هتعدي، ولكن أنا حسيت ومش عايزة أشوف إثبات، والست الناصحة متخربش على نفسها، وعملت مش واخدة بالي وعدت.
وعن علاقتها بجمهور النادي الأهلي، فعلقت لقاء الخميسي: جمهور الأهلي معرفش عنه حاجة، أنا بشجع الأهلي علشان بحبه، وجوزي بيشجع الزمالك فأنا بشجع الزمالك، ولو الأهلي بيلعب مع أي حد أو برا هشجعه بيمثل مصر.
وعن أزمتها مع جمهور نادي الزملك، فقالت لقاء الخميسي: جت فترة جمهور الزمالك كان بيشتم وأنا كنت برد، مقدرش أني مردش أسكت لو حد جه ناحية جوزي أو أبويا، وأنا اللي بحسه بقوله على طول ومبستناش، وجوزي كان هيتجنن مني هو مكنش عايز يرد.
كما كشفت لقاء الخميسي، كواليس فترة تدريب زوجها في نادي الزمالك، قائلة: هو عارف أنه داخل في مرحلة صعبة وممكن في أي وقت ميكملش لأن أي مدرب بيتغير، وهما متعودين على مدرب أجبني والأجنبي بيجي بالفريق بتاعه، ده كل الموضوع.
برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.

لقاء الخميسي: أمي مسيحية وكانت بتصوم رمضان معانا.. وكنت بروح معاها الكنيسة وأصلي زيها
لقاء الخميسي: مفيش فرق بين الإسلام والمسيحية واليهودية.. وكلنا جزء من ربنا


تحدثت الفنانة لقاء الخميسي، عن الجدل الذي أُثير خلال الفترة الماضية حول ديانتها، وذلك بعد حديثها عن كونها مسلمة بالوراثة.
وقالت لقاء الخميسي، خلال استضافتها ببرنامج "أسرار" مع الإعلامية أميرة بدر المذاع على قناة النهار: أنا مسلمة، أبويا مسلم وأنا مسلمة، ومعنى كلمة مسلمة أني أسلمت قلبي لـ الله، كل واحد جواه ربنا، شايف ربنا إزاي ومعتنق ديانة إيه دي تخص كل واحد متخصش حد تاني، وأنا شايفة أن كل الأديان بتعرف ربنا، ووالدتي مسيحية، وأمي عمرها ما دخلتنا في القصة دي.
وتابعت لقاء الخميسي: أمي مسيحية وكانت بتصوم معانا رمضان وتصحينا نصلي الفجر، هي بتصلي لـ ربنا بطريقتها وروحت معاها مرات كتير جدًا الكنسية وصليت، وهي نفس الصلاة لكن الطقوس مختلفة ، والمسلم زي المسيحي زي اليهودي، والناس مش شايفة كده وكل واحد عنده أفكاره، أنا قرأت في التاريخ والدين كتير جدًا.
وأضافت: مفيش فروق بين الأديان هو نفس الكلام، إحنا محتاجين نعرف ربنا، إحنا جزء من ربنا، مش بيقولك ونفخنا فيه من روحنا؟ الطبيعي نطلع مسلمين يعني أسلمنا قلبنا بـ الإله، يبقى كلنا زي بعض.
برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.