حازم إمام نفسى الزمالك يكون زى برشلونة واحنا جايين نعمل سيستم ونمشي والناس فهمت ميدو غلط
قال حازم إمام عبر إذاعة أون سبورت إف إم : ميدو طلع إمبارح مع الزميل العزيز إبراهيم عبد الجواد، وفي ناس أخدت كلامه إنه قال إن في حد داخل نادي الزمالك مش بيساعد
وأضاف نجم نادى الزمالك السابق، عايز أقول إن ميدو بيكن كل الاحترام والتقدير لكل أعضاء مجلس إدارة الزمالك
وأوضح بالعكس لجنة التخطيط جت عشان تساعد وتساند الناس، مش تعمل خلافات بين هنا وهناك
وأكد حازم إمام ، ان ميدو بيحترمهم كلهم، هو عايز ينجح وهما كمان، والهدف واحد، ومفيش مشاكل إطلاقًا
وأضاف بس أنتم عارفين، لما بيكون هناك هزيمة أو إخفاق، تظهر الخلافات أو اختلافات الناس بتطلعها
وكشف أنا اتكلمت مع الكابتن حسين وقلت له الكلام ده، إن إحنا جايين نعمل حاجة، والأساس إن يكون في هيكل لقطاع كرة القدم وتجيب مدير رياضي ومدير تعاقدات، وتحت المدير الرياضي يكون في كشافين، وتحليل بيانات وإحصائيات
موضحا يعني نعمل هيكلة كاملة لإدارة الكرة في الزمالك، من الناشئين لحد الفريق الأول والمدير الرياضي هيكون مسؤول مع المدرب عن الاستراتيجية، والأهداف القريبة والبعيدة، ومين يصعد للفريق الأول ومين يتباع
مشيرا إلى أن ذلك هو الهدف الأساسي للجنة التخطيط، وبعد كده هنمشي
وأضاف إحنا جينا عشان نساعد ونساند في وقت معين، لكن فكرة إنك تعتمد على أشخاص وقت الزنقة ده طبيعي
لكن لما يكون هناك سيستم، مش مطلوب إنك تكون موجود، إنت تعمل السيستم وتمشي
وأضاف ولو احتاجونا أكيد هنكون موجودين، بس الهدف الأساسي هو عمل سيستم
وكان في سيستم قبل كده، بس مش بالشكل اللي إحنا عايزينه من ناحية قطاع الناشئين وشوفنا برشلونة مثلًا، 90٪ من لاعيبتهم من أبناء النادي مش زي ريال مدريد أو باريس، برشلونة عندهم أحسن قطاع ناشئين في العالم
أنا قصدي إن لجنة التخطيط مش جاية تزاحم أو تاخد اللقطة وكل واحد في مكانه كويس، ولو الكلام ده اتنفذ والنادي اشتغل بيه، إحنا هنكون برا .. سواء أنا أو ميدو أو عمرو الجنايني
مش عايزين نكون موجودين، السيستم يمشي والدنيا تشتغل من غير حازم وميدو، حتى لو مجلس الإدارة اتغير وجيه مجلس تاني وده التفكير الحقيقي للجنة التخطيط
اقرأ أيضًا:
نكشف التفاصيل الكاملة لمفاوضات الزمالك مع بيرسي تاو
موضوعات ذات صلة
