فيديو .. عبدالغني غاضباً : الأخ جودزيلا فتوة الألتراس بيهددني وأنا ما بخافش

كتب - أسامة صديق :

أكد الكابتن مجدي عبد الغني مقدم برنامج السادسة مساء على قناة مودرن سبورت، أن البرنامج أرسل كاميرا إلى مقر نادي الزمالك لمعرفة رأى الجماهير فى أحمد حسن عميد لاعبي العالم، وهل حصوله على اللقب او خسارته ،يفرق مع جمهور الزمالك .

وقال "هذا وضع طبيعي ان نرسل الكاميرا الى نادي الزمالك بيت حسن الجديد، لكن للأسف الشديد وقعت احداث غريبة، الأخ جودزيلا فتوة الالتراس بعتلي تهديدات شديدة اللهجة مع المصورين امام نادي الزمالك، وهو 21 سنة اصغر من ابني احمد، وما اعرفش متعصب علي ايه، ولم فوق الخمسين واحد لخطف الكاميرا من فريق العمل، وخدوا الشريط اللى احنا مصورين فيه شغل كتير، لانهم فوق القانون "

وأضاف "الاخ جودزيلا بيحذرني ، وبيقولهم روحوا بلغوا القسم، وانا ببلغ سيادة الوزير محمد ابراهيم وزير الداخلية".

وتابع "اذا البلطجة دي ما انتهتش يبقي كلنا نقول كل سنة وانتوا طيبين، ومهما اختلفنا لا يمكن نوصل للمرحلة دي، وانا اعرف قيمة الزمالك من قبل ما يتولد جودزيلا ، مين ده اللى يخطف شريط ويتحدى القانون ، ومعروف وموجود قدام نادي الزمالك وبيبلطج وما حدش بيكلمه، والا نرجع عشائر وقبايل ونروح نجيب ناس من الصعيد ومن الصحرا علشان نحمي بعض، والفريق قالوا هنسجل معاك وقول رأيك، وكنا هنذيع كلامة في إطار الأدب".
 
وأوضح "لازم نقول حقايق ، ونتقبل الراى الأخر، انما يخطفوا الكاميرا لولا ناس عقلاء ومحترمة رجعت الكاميرا، وهي عهدة على المصور، هي بقت العملية دراع مين اللى ياكل التاني، هنضيع كلنا ، والبلطجي قبل المثقف، والصفوة اللى بيتكلموا هما اول ناس هتهج ، واحد يتحدي بهذا الشكل ، ويمسك مصور رجل مريض رايح يأدي عمل ، ويضربوه ، ولو حد مسكهم يقولك ده فريق العمل اتعدي عليهم، هو انت بتحارب الانجليز ولا بتطلع اليهود من سيناء، مش فاهم فى ايه،اللى شايل الكاميرا ده مصري بياكل عيش مش يهودي .

واختتم عبدالغنى كلامه قائلاً "انا بقول لوزير الداخلية الكلام ده مش هينفع ولازم القضاء على البلطجية، ودي رسالتك لازم تؤديها ،وربنا قال ان البلطجية ينفو من الأرض، وبقوله للأخ جودزيلا كان افضلك تسجل مع البرنامج وتقول وجهة نظرك ، وانت زي ابني وانا ما بخافش".