الحناوى يقلب الفيس بعد كشف فضيحة مسؤول الاتحاد السكندري وراء تدميره نفسيا..نكشف موقف رمضان صبحي من اللعب أمام الأهلي

21 يوليو 2024 الساعة 11:41 صباحا

 
فوزي الحناوى يقلب الفيس بعد كشف فضيحة مسؤول فى الاتحاد السكندري وراء تدميره نفسيا
 
قلب فوزى الحناوى، لاعب فريق الإتحاد السكندري، لكرة القدم ،مواقع التواصل الإجتماعى، حيث تم تداول منشوره الذي كشف عن الضغوط النفسية الهائلة التى تعرض لها منذ بداية الموسم، بسبب محاولات احد مسؤولي نادي الإتحاد السكندري، أقناعه بتخفيض عقده بنسبة تصل إلى خمسين فى المائة .
وكتب الحناوى عبر صفحته على الفيس بوك، السلام عليكم ورحمة الله وبركاتهمعرفش الكلام ده هيضيع مستقبلي في الكوره ولا لا بعد انهارده  بس لازم ابرء نفسي من كل دقيقه عدت عليا السنادي قدام ربنا  مستفدتش بيها ولا النادي استفاد مني بيها  أنا اول حاجة / بشكر الريس محمد مصيلحي علي كل حاجة حصلت منه في السنين اللي عيشتها في نادي الاتحاد عمره ما اخر علينا جنيه ودايما شايل النادي علي كتفه ...
وأضاف  الحناوي  تاني حاجة /بشكر جمهور الاتحاد اللي كان بيحبني واللي كان بيشتم فيا الكوره مش دايما حلوه ومش دايمآ وحشه بس فيه كواليس مفيش حد بيعشها الا اللعيبة فقط حتي مبتوصلش للادارة …
واضاف نجم وسط الإتحاد السكندري، تالت حاجة / أنا واحد مخدتش فرصتي كاملة عشان تحكم عليا أنا واحد لما خدت فرصتي وبقيت العب كان بيتطلب مني حاجات معينة من المدير الفني بنفذها وده بيضرني كا واحد مهاجم وأرقامه قليلة ولعبت في مراكز كتير في ماتشات كتير مش مركزي ولكن أنا كنت تحت امر النادي واي مدير فني محترم كان ماسكني وشاركت معاه أنا من أربع سنين لما كنت فريي وببلاش أنا اللي جيت نادي الاتحاد جيت عشان بحب النادي واختارته من قلبي وانا مسامح اي حد اذاني او غلط فيا من جمهور النادي لان دايما خوفه علي النادي فده طبيعي عشان مش طول الموسم هيشجع ولا طول الموسم هينتقد هي دي الكوره فا دايمآ جمهور الإتحاد علي راسي مهما حصل من صغر واحد لأكبر واحد …
وأكد فوزي الحناوي رابع حاجة / أنا عمري ما هسامح اي شخص اذاني الموسم ده أنا اتئاذيت من كل حاجة أنا نفسيآ اتدمرت أنا من اول الموسم لما (شخصآ ما ) قعد معايا عشان انزل من عقدي وانا رفضت عشان ده اللي اتفقت عليه من اول الموسم ومن يوم ما رفضت وانا الدنيا اتقلبت عليا من المدير الفني والأستاذ (إ.ج ) وقالي بالحرف اليوم ده وربنا الوحيد اللي يشهد علي كل حرف أقوله قالي ان النادي عايز ينزل من عقود اللاعيبه عشان بينزل بسقف الرواتب ردي عليه كان أنا عقدي مش كبير بس أنا موافق وتحت امر النادي بس لما تبداء باللي عقدهم كبير وفيه ارقام كبيرة وده طبعا ربنا يزيدهم ده رزقهم ومش هقول ارقام لان دول اخواتي وفلوسهم هي فلوسي بس ده كان ردي  قالي طيب فكر في الموضوع ولو رفضت يبقي الكلام ده بيني وبينك واكننا مقعدناش .. ده غير اللي عرفته في حوار ٥٪؜ بس ده مقدرش أتكلم عنه عشان ميكونش فيه أذي ليا  والكلام ده كله الاداره معندهاش علم بيه والكلام ده في فترة الإعداد أنا من بعد اليوم ده وانا بتدمر وملعبنيش دقيقه وحده ولا خدت فرصتي مع ان في التمرين كنت بموت نفسي واللعيبه كلها شاهدة وجزء من الجهاز شاهد وكان شايف .. ده غير انه كان بيمرني ورا الجون لوحدي ومكنتش بفتح بوقي ولا بتكلم وعشان حق ربنا واكون قولت اللي ليا واللي عليا أنا في.
وقال الحناوي ،آخر الدور الاول كده كان عندنا ماتش مع بيراميدز كنت في الاسكور وسافرت القاهرة ، وفرحت خلاص قربت أشارك مابولولو  اتصاب فجاب لعيب من الناشئين يوم الماتش علي الاستاد ومن غير اي سبب طلعني بره الاسكور مع ان كان واخد 2  لعيبة زيادة عشان لو حد اتصاب فا أنا غصب عني عشان أنا بني ادم زعلت وقولت حسبي الله ونعم الوكيل في كل ظالم والكلام وصله ولما صدق يلاقيلي غلطه بس أنا مغلطتش أنا بدعي ربنا للي ظالمني لو هوا ظالم …
خامس حاجه / أنا لعيب متربي في النادي الاهلي ومنتخبات المراحل بتاعتي كلها كنت متواجد فيها وشاركت فيها أنا مش لعيب وحش الحمدلله رب العالمين أنا عندي موهبه وبحمد ربنا كل دقيقه عليها ولكن الشخص ده عمره ما حب اي موهبة  بس أنا مش طالع اعلق شماعه ولا اتحجج بحاجة بس أنا واحد أتظلم الموسم كله وانا مستاهلش كده مستاهلش كده عشان بتمرن كويس وبحترم الصغير قبل الكبير وعمري ما عملت مشكله أنا طبيعي اطلع أبرء نفسي من موسم صفري بالنسبالي عشان أنا في نادي جماهيري وده آخر موسم ليا مينفعش اسيبهم وفيه حاجه شايلنها جواهم وحشه من ناحيتي ..
واختتم فوزي الحناوى، سادس حاجه / أنا لعيب حر دلوقتي واتمني ربنا يوفقني وامضي لنادي كويس اقدر اساعده ويساعدني أنا اسف إني طولت بس كان لازم أقول بعض الحاجات اللي حصلت معايا عشان أنا كنت بتمرن ومصحف ربنا والدمعه  في عيني أنا وحياة ابني اللي عمري ما هحلف بيه كدب متدمر نفسيآ وحسبي الله ونعم الوكيل من كل قلبي لأي شخص ظلمني آخر حاجه ( انا كان لازم اوضح بعض الحاجات اللي حصلت معايا )  بس أنا ربنا عمره ما هيضيع تعبي ولا هيخذلني حتي وانا لوحدي ومفيش حد في المجال كله واقف جنبي.
 
نكشف موقف رمضان صبحي من اللعب أمام الأهلي 
 
كشف مصدر بنادي بيراميدز عن موقف رمضان صبحي لاعب الفريق الأول لكرة القدم بالنادي من المشاركة في مباراة الأهلي المقبلة في مسابقة الدوري المصري الممتاز.وأكد المصدر أن رمضان صبحي سيتواجد بنسبة كبيرة في قائمة بيراميدز لخوض مباراة الأهلي المقبلة، وشدد على أنه اللاعب لن يبدأ في التشكيل الأساسي للمباراة وسيتواجد على مقاعد البدلاء.
ويستعد الفريق الأول لكرة القدم بنادي بيراميدز لمواجهة الأهلي ،غدا  الاثنين  بإستاد الدفاع الجوي في الجولة الحادية والثلاثين لمسابقة الدوري المصري الممتاز.
 
جدير بالذكر أن الأهلي فاز على بيراميدز بثلاثية مقابل هدفين في مباراة الدور الأول التي أقيمت منذ أيام قليلة بإستاد القاهرة الدولي.